وطارت فلوس العروس
مسكين كاشخ وبوزه نصين حتى بدون نكته يضحك حتى انعال الزنوبه مايلبس لأن خلاص بيتزوج لكن المشكله بعد شهر اتفقو ان يقيمو حفل عقد القران وصممت العروس تسوي العرس في قاعة معروفه بمبلغ كبير مع البوفيه المفتوح ومصره ان تعزم الكل وفعلاً بدأت تشتري فستان الزواج وتخطط مكان الصالون والمكياج والتسريحه والدعوات وسفرة العجم وسفرة لهنود والتصوير أما هالمعرس المسكين صار يراكض وراها من مكان الى مكان تدرون ليش علشان يدفع دم قلبه ودم تعبه وشقى عمره وطبعاً من الفرحه ما يقدر يرد شي من طلبات حبيبة قلبه العروس او طلبات ام العروس وكل ما يقول شي قالو له ( خلها تستانس بنتنا مو كل يوم بتتزوج ) والمشكله حاط في مخه وتفكيره عقده ويقول زين قبلوني وهذا تفكير سخيف لأن لازم يعرفون الشباب ان البنات او الأهل اللي يرفضون اي شاب مقتدر وملتزم وفاهم دليل على وجود عيب فيه هذا خطأ لأن العكس الشاب هو الذي يكون في هذه الحالة افضل من البنت طبعاً نحن نقصد البنات الدليعات اللي درسوا شوية في الجامعه او معهد أو البنات إاللي يفكرون انهم اجمل وأحلى وأذكى مافي الكون و ينتظرون فارس الاحلام (( الخروف اذا مو مستوي ماله طعم )) وفي النهايه من زود ما يعيبون ويرفضون فلان وعلان يطبون في مصيبه ما يتوقعونها.. عكس البنات اللي ما يغترون بالمظاهر والجمال والكماليات بل في الحسب و النسب وبالشاب الصالح مهما كان مستواه المادي او مظهره الشكلي.طبعاً هذه هواجس الناس خصوصاً ارتفاع معدل العنوسه في البحرين واحنا خايفين على بناتنا من توجه الشباب هذه الايام الابتعاد عن البحرينات والزواج من اجنبيات ... مثلا واحد تزوج فلبينية كل يوم تطبخ له أكلات مايدري ويش هي بس ويش يسوي ياكل ويسكت الحب أعمى ، وواحد تزوج من لبنانية ساعات تقوله شو هيك يفكر تبغي كيك وواحد تزوج مغربية وكله تقول له برشا برشا وهو ما يدري يفكر غرشه غرشه وشحن البيت اغراش ... وخوفنا على بناتنا لا يعقدّون امور الزواج وذبح الشباب بمصاريف وعزايم .
المهم جاء يوم الزفاف ذهبت العروس للمكياج والتسريحه اهلها مشغولين معاها والناس ذهبت من وقت مبكر الكل اخذ عائلته واهله رغم ظروفه وانشغالاته وحده حجزت ولدها والثانية حجزت زوجها.. وحده حجزت امها او ربعها ليذهبون ليباركون العروس ، الناس بدأت تزحف الى مكان العرس ومرت ساعه ساعتين 3 ساعات 4 ساعات الكل ينتظر المصونه العروس (( الطرحه طبت والشال خلس )) الكل يتساءل العروس ماجت للحين نبغي نشوفها هذي لو سياره جيب حق سمكره من زمان برزت... وحده انتظرت الى وقت متأخر حوالي الساعه 12 في الليل العروس ماوصلت الثانية انتظرت العروس ويوم وصلت العروس البوفيه ما خلوه يقولون امها ما وصلت لأن للحين في الصالون شعرها احترق المهم صارت الناس تنقص وتمشي شوي شوي واكثرهم ماأكلو ولا شافو العروس اخيرا الكل راح وتمت بس ام العروس (( ما يطب على الفحم الا دهن الكباب )) الكل يتساءل هل هذه التصرفات طبيعية ام انها استهتار وعدم احترام الناس والمعزومين والناس ترى ملتزمين باشغال واعمال ومواعيد وارتباطات وحضرة العروس واهلها يطنزون بحجة انها في الصالون وفي النهايه وبعد كل هالخساير من قاعه وبوفيه وصالون ومصاريف تدخل القاعه ومافي وراها الا امها وخواتها وكم وحده إستحو يمشون ..
(( البخور مايحب لزفوره )) هذا التصرف هل دليل على تقدمنا او تأخرنا والحكم لكم . طبعاً كتبت هذا الموضوع رغبة من بعض الاخوات إللي يحسون بلوعه من هذه التصرفات والمبالاغات التي تتمنى ان ينظر اليها المجتمع بعين الاهتمام نرجوا ان وفقنا بتوصيل فكرتها وفكرة الكثير من الناس بطريقه مقبوله .